Килешәсең, бугай, минем белән,
Әйтик әле, әйдә, дөресен –
Сакламаган тәүге сөюләрне
“Юләр” дими безне кем дисең?

Ике юләр, икәү генә шул без!
Ике юләр – икәү син дә, мин.
Онытырга син дә теләмисең,
Онытырга мин дә теләмим!

Син дә юләр, мин дә юләр булган –
Икебез дә булган бер чама.
Шуңадыр да сөю дигәннәре
Сагындырып бездән үч ала.

Юләр дими ни диясең инде,
Ник әрәмнәр иттек яшьлекне?
Йөгерә-йөгерә сөләрдән качып,
Я, кайсыбыз тапты бәхетне?